بـــردی کربابایف

 دین دألمی؟  (1930)

عارضيم سانگا، دوش سؤزيمه، اى انه!

حق- حقوقينگ غانگريپ آلان دين دألمى؟

نأمه اوچين بويون اگيأرسينگ يـنه،

ال- آياغينگ باغلاپ قويان دين دألمى؟

دوشونمه دينگ، چويرأپ گيتدى كأن يئللار،

ايندى برى حايال اتمه، چك الينگ.

دين- شريغات ايشان، ملانگ گره گـى،

دين اوستوندن اييأرلر اولار چؤره گـى.

آلداماقليق، غاپماق اوچين غاراغى،

روحانىلانگ بار ياراغى دين دألمى؟

دين آديندان شولار روغصات برديلر،

بايلار سيزى ازيپ، دؤران سورديلر.

باشدان- آياق بورونجگه بوره دى،

آغيز- بورنينگ ياشماق بيلن سارادى.

ياريم پوط بؤريكده به ينينگ چؤره دى.

عمر كؤكينگ كرتيپ گلن دين دألمى؟

بسدير، شونچه جبر گؤره نينگ يـتر،

دين زأهردير اوندان باشينگ غوتار!

مال حؤكمينده سنى بازارلاپ ساتان،

باشينگ بورأپ، دؤردينگ بيرينه چاتان.

دوغانينگـى غـورپا سوسسيريپ  آتان،

دورموشينگـى ويران ادن دين دألمى؟

اويلاپ گؤرسنگ، اول اينگ غانيم دوشمانينگ،

سوليك يالى سوريپ گلدى- ده غانينگ!

تارى بيلن نأزيك دلينگـى باغلاپ،

تاغماسينى باسدى، يوره گينگ داغلاپ،

ال- آياغينگ گويلأپ، چالماغا چاغلاپ،

آغزينگ اؤرتيپ لال غالديران دين دألمى؟

غير تارينگـى، آغيز- بورنينگـى بوشلا،

واقت يـتدى، ديله گليپ، سؤز باشلا!

غيريق اگيليپ، اوقاتديريپ نمازى،

غارا گونه سالدى گؤركزمأن يازى.

يتميش يآشلا بريپ اون ياشلى قيزى،

باى  كه يـپـينه غوربان ادن دين دألمى؟

آى باسيم بول، آياق اوستونه غالسانا

دين كؤكينه باقى پالتا سالسانا!

اركينگ آليپ، اركلى اديپ ايشانى،

يونگلى غانارلاردان به تر چيشه نى،

آقلاپ، قولداپ أهلى حتـدن آشانى

اوستونگيزدن حؤكم اتديرن دين دألمى؟

ارك الينگده ايشانلارينگ پندين بر!

شارتا يولوپ، سانگا داقان " بندين" بر.

سانسيز جبر بردى سانگا باياقلاپ،

ياغرينگينى يره دپدى تاياقلاپ،

تاياقلارا ياسسيق ادن دين دألمى؟

اييأم باياق سندن غارا گون اؤتدى،

اؤز- اؤزینگه ارك اتمأگه واقت يتدى.

" عـيـبدير" دييپ، دييجك سؤزوينگ ديديرمأن،

غاباپ آليپ، اركلى دونينگ گه يديرمأن،

اوزاق گونلأپ سيريلجاديپ، اييديرمأن

روزه دييپ آچ غالديران دين دألمى؟

آغيز بكلأپ، روزه توتيامينگ هنيز؟

بئيله نادانليغا يول برمه هرگيز!

" دوزخ" وهمى بيلن دورموشينگ بوزدى،

ديندارلار " بهشتيـن" گوجنگلأپ گزدى،

باى، سودخورلار سنى دپگيلأپ ازدى،

همه سين توتالغاسى دين دألمى؟

اينانما سن " دوزخ"، " بهشت" سؤزلرينه،

غاضپ بيلن تويكور اولانگ يوزونه!

آچ واغـتينگدا ديندان پيدا يتديمى؟

كسللأنگده حيـى بير درمان اتديمى؟

اؤز عمرينگده بير ديله گينگ توتدومى؟

غايتا دردينگ سبأبكأرى دين دألمى؟

ايندى برى توره دوشيپ اوتورما،

يول آرانگـى، غـولاينگا گتيرمه!

آزاد اؤزونگ يالى بوتين عياللار!

غـورولشيقدا ايشلأپ يؤر آى، يئللار.

اولانگ غـوجيريندان اؤزگريأر چؤللر،

اما سنى غايرا غـويان دين دألمى؟

دينى تاشلا دينسيزليگه برك ياپـيش

تأزه دونيأ غوريان باغیت يولونا دوش.

اوغلان-اوشاق، همه گلين- غيزلاريميز،

تريم- تيقيسز اورتا مكتب، ووزلاريميز،

يوردى دولانديريار كأن عياللاريميز

اما سنى آليپ غالان دين دألمى؟

دين بير اوتدير، يانيپ غالما پيكير ات،

آچ پردأنگـى تأزه دونيأ نظر ات!

اؤزونگ تاشلا، غـونگشينگا- دا تاشلاتدير،

دين- عاداتين آرانگيزدان داشلاشدير،

اؤزونگ ايشله ماشغالانگام ايشلتدير،

ايشه- گويجه پأسگل بريأن دين دألمى؟

قبول ات سن، آل تؤوللأم اى انه،

موندان سونگرا غايديپ باقماغين دينه!

Din dälmi?

Arzym saña, düş sözüme, eý ene!

Hak-hukugyñ gañryp alan din dälmi?

Näme üçin boýun egýärsiñ ýene,

El-aýagyñ baglap goýan din dälmi?

Düşmediñ, çüýräp gitdi kän ýyllar,

İndi bir haýal etme, çek eliñ.

Din-şerigat işan, mollañ geregi,

Din üstünden iýýärler olar çöregi.

Aldamaklyk, gapmak üçin garagy,

Ruhanylañ bar ýaragy din dälmi?

Din adyndan şolar rugsat berdiler,

Baýlar sizi ezip, döwran sürdüler.

Başdan-aýak bürenjege büredi,

Agyz-burnuñ ýaşmak bilen sarady.

Ýarym put börükde beýniñ çüýredi,

Ömür köküñ kertip gelen din dälmi?

Besdir, şonça jebir göreniñ ýeter,

Din zäherdir ondan başyñ gutar!

Mal hökmünde seni bazarlap satan,

Başyñ büräp, dördüñ birine çatan.

Doganyñy gorpa süssürip atan,

Durmuşyñy weýran eden din dälmi?

Oýlanyp görseñ, ol iñ ganym duşmanyñ,

Sülük ýaly sorup geldi-de ganyñ!

Tary bilen näzik diliñi baglap,

Tagmasyny basdy, ýüregiñ daglap,

El-aýagyñ güýläp, çalmaga çaglap,

Agzyñ örtüp lal galdyran din dälmi?

Gyr taryñy, agyz-burnuñy boşla,

Wagt ýetdi, dile gelip, söze başla!

Kyrk egilip, okadyryp namazy,

Gara güne saldy görkezmän ýazy.

Ýetmiş ýaşla berip on ýaşly gyýzy,

Baý keýpine gurban eden din dälmi?

Aý basym bol, aýak üstüne galsana,

Din köküne baky palta salsana!

Erkiñ alyp, erkli edip işany,

Ýüñleni ganarlardan beter çişeni,

Aklap, goldap ähli hetden aşany,

Üstüñizden höküm etdiren din dälmi?

Erk eliñde işanlaryñ pendin ber!

Şarta ýolup, saña dakan «bendin» ber!

Sansyz jebir berdi saña baýaklar,

Ýagryñyny ýere depdi taýaklap,

Taýaklara ýassyk eden din dälmi?

Eýýam baýak senden gara gün ötdi,

Öz-özüñe erk etmäge wagt ýetdi.

«Aýypdyr» diýip, diýjek sözüñ didirmän,

Gabap alyp, erkli donuñ geýdirmän,

Uzak günläp syryljadyp, idirmän,

«Roza» diýip aç galdyran din dälmi?

Agyz bekläp, roza tutýamyñ heniz?

Beýle nadanlyga ýol berme hergiz!

«Dowzah» wehmi bilen durmuşyñ bozdy,

Dindarlar «behiştin» güjeñläp gezdi,

Baý, süýthorlar seni depgiläp ezdi,

Hemmesiniñ tutalgasy din dälmi?

Ynanma sen «dowzah», «behişt» sözlerine,

Gazap bilen tüýkür olañ ýüzüne!

Aç wagtyñda dindan peý ýetdimi?

Keselläñde hiý bir derman etdimi?

Öz ömrüñde bir dilegiñ tutdumy?

Gaýta derdiñ sebäpkäri din dälmi?

İndi bir tora düşüp oturma,

Ýol arañy, golaýyña getirme!

Azat özüñ ýaly bütin aýallar!

Gurluşykda işläp ýör aý, ýyllar.

Olañ gujyýryndan özgerýär çöller,

Emma seni gaýra goýan din dälmi?

Dini taşla dinsizlige berk ýapyş,

Täze dünýä gurýan bagt ýoluna duş!

Oglan-uşak, hemme gelin-gyýzlarymyz,

Trym-tyksyz orta mekdep, vuzlarymyz.

Ýurdy dolandyrýar kän aýallarymyz,

Emma seni alyp galan din dälmi?

Din bir otdur, ýanyp galma, pikir et,

Aç perdäñi täze dünýä nazar et.

Özüñ taşla, goñşuña-da taşlatdyr,

Din adatyn arañyzdan daşlaşdyr,

İşe-güýje maşgalañam işletdir,

İşe-güýje päsgel berýän din dälmi?

Kabul et sen, al töwelläm eý ene,

Mundan soñra gaýdyp bakmagyn dine!

استفاده از مطالب اين سایت با ذکر منبع بلامانع مي باشد